THAMANI YA SHAMBA LA MIPAINA/PINES HAIPO KWENYE WINGI WA MITI

 

Shamba la Miti ya Mipaina/Pines ambayo haijapunguziwa

Karibuni tena kwenye SmartForestry na leo naomba kuzungumzia kuhusu Thamani ya shamba la Mipaina/Pines katika kilimo cha kibiashara kwa kuangalia faida na hasara za kuwa na miti mingi shambani. Tunaongelea Mipaina zaidi kwa sababu ndio miti pekee inayotawala kwenye soko hasa la mbao kwa sasa, hivyo ubora na thamani yake ipo zaidi kwenye unene na urefu wa mti shambani.

Tukirejea kwenye maandiko yangu yaliyopita nimezungumzia kwa undani mbegu bora na upandaji miti, idadi gani ya miti inapaswa kupandwa shambani na umbali wa mti na mti unaopendekezwa. Unaweza rejea makala zangu zilizopita kwa maelezo zaidi.

“Naomba nikazie kwa kusema kuwa Thamani ya shamba la Mipaina/Pines haipo kwenye wingi wa miti shambani, kitu cha msingi kuzingatiwa ni kuhakikisha unapanda kwa umbali angalau mita 3x3(Ft9x9) na unapunguzia miti kila baada ya miaka mitano”

Punguza angalau theluthi moja (1/3) ya miti iliyopo shambai kwako pale miti inapofikisha miaka 6 (sita) na kufanya hivyo tena pale miti inapofikisha umli wa miaka 11(kumi na moja) kwa kuhakikisha inabaki nusu ya miti iliyopandwa mwanzoni.

Mfano: Kama ulipanda miti 545 katika shamba lako la ukubwa wa mita 70x70. Baada ya miaka 5 unatakiwa kupunguzia miti angalau 150 ndani ya shamba lako na kubakisha miti 395. Hakikisha pia kwenye umli huu Upogoleaji/Pruning ya kwanza iwe imefanyika. Hapa itabidi upunguzie tena baada ya miaka mitano mingine kwenye umli wa miaka 11 kwa kupunguza miti angalau 120 ili ibaki miti 275 ndani ya shamba ambayo itavunwa kwa faida kubwa zaidi.

FAIDA ZA KUPUNGUZIA MITI

Kupunguzia miti (Thinning) katika shamba la miti ni zoezi la kuondoa baathi ya miti na kuacha mingine ili kuipa nafasi nzuri ya ukuaji. Na mara nyingi inafanyika kwenye shamba la miti kuanzia mwaka wa kwanza hadi wa sita kwa kuondoa miti ambayo ni migonjwa au ile inayokuwa kwa kupinda. Miti ilioachwa baada ya kupunguza mingine hukua kwa haraka kwa kupata zaidi mwanga wa jua na hewa pamoja na kuipunguzia urefu wa seli bomba za mti (Tracheids) ambazo zina kazi ya kupitisha maji pamoja na  virutubisho kwa ukuaji wa mti.

Pia hupunguza athali za wadudu waharibifu kwenye ngozi ya mti (Dendroctonus adjunctus), zoezi hili pia hupunguza madhala ya moto kwenye shamba na huongeza kiwango cha uozaji wa majani ya miti kwa ajili ya kurutubisha ardhi.

Biashara ya mbao kwa miti iliyopunguzwa kwenye mwaka wa sita itaweza kukupatia fedha kwa ajili ya matunzo ya mashamba yako ya miti na kukuongezea kipato kabla ya uvunaji wa mwisho. Hivyo sio maamuzi sahihi kuvuna miti yako yote kabla haija komaa na yenye kukupa hasara.

Matokeo muhimu ya kupunguzia miti ni kuongeza ujazo/ukubwa na thamani ya kibiashara kwa mti mmoja mmoja ndani ya shamba la miti ambapo miti hurefuka zaidi na kutanuka zaidi kuwa na kipenyo (Diameter) kikubwa chenye kutoa mbao bora na zenye thamani kubwa. Ambapo unaweza kuuza mti mmoja kwa zaidi ya TSh. 100,000/ na zaidi.